ਚੱਲ ! ਕਰੀਏ ਵਕਤ ਨੂੰ ਮਖੌਲ ਐ ਦਿਲਾ !
ਚੱਲ ! ਸੂਰਜ ਨੂੰ ਬੁਲਾਈਏ ਕੋਲ਼ ਐ ਦਿਲਾ!
ਲੈ ਗਈ ਨ੍ਹੇਰੀ ਉਡਾ
ਕੇ ਆਲ੍ਹਣਾ ਤਾਂ ਕੀ
ਚੱਲ ਤੀਲ੍ਹੇ ਫੇਰ ਲਈਏ
ਟੋਲ਼ ਐ ਦਿਲਾ !
ਲੱਭ ਜਾਣੇ ਨੇ ਗੁਆਚੇ
ਚੰਨ ਤਾਰੇ ਸਭ
ਇਕ ਵਾਰ ਬੱਦਲਾਂ ਨੂੰ
ਫੋਲ ਐ ਦਿਲਾ !
ਬਹੁਤ ਰੋਇਆ ਚੀਕਿਆ, ਹਉਕੇ ਭਰੇ ਬੜੇ
ਇਕ ਬੋਲ ਹੌਸਲੇ ਦਾ ਬੋਲ ਐ ਦਿਲਾ
!
ਹੱਥ ਨੇ ਤੇਰੇ ਸਲਾਮਤ,ਸਿਰ'ਤੇ ਉਹਦਾ ਹੱਥ
ਕਿਹੜੀ ਗੱਲੋਂ ਫੇਰ ਡਾਵਾਂਡੋਲ ਐ ਦਿਲਾ !
ਹੰਝੂਆਂ ਦੇ ਕਾਫਿਲੇ ਨੂੰ
ਮੋੜ ਪਿੱਛੇ ਵੱਲ
ਹਾਸਿਆਂ ਦੇ ਲਈ ਬੂਹੇ
ਖੋਲ੍ਹ ਐ ਦਿਲਾ !
ਚੁੱਕ ਲੈ ਹੁਣ ਫੇਰ ਤੋਂ
ਮਿਹਨਤ ਦੀ ਛਾਨਣੀ
ਚੱਲ ! ਰੋੜਾਂ ਵਿਚੋਂ ਮੋਤੀ ਰੋਲ
ਐ ਦਿਲਾ !
ਚੱਲ ! ਕਰੀਏ ਵਕਤ ਨੂੰ
ਮਖੌਲ ਐ ਦਿਲਾ !
ਚੱਲ ! ਸੂਰਜ ਨੂੰ ਬੁਲਾਈਏ
ਕੋਲ਼ ਐ ਦਿਲਾ !
No comments:
Post a Comment