ਨਹਿਰਾਂ ਦੇ ਕੰਢੇ ਕੰਢੇ ............

ਨਹਿਰਾਂ ਦੇ ਕੰਢੇ ਕੰਢੇ  , ਬਿਰਖਾਂ ਦੇ ਕੋਲ ਕੋਲ

ਲਿਖੀ  ਗਈ  ਇਬਾਰਤ  ਹੈ  ਖ਼ੂਨ  ਡੋਲ੍ਹ  ਡੋਲ੍ਹ

ਸੂਰਜ ਨੇ ਪੜ੍ਹ ਲਈ ਹੈ ਅੰਬਰ ਨੇ ਸੁਣ ਲਈ ਹੈ

ਪੌਣਾਂ  ਕਿਤਾਬ  ਜਿਹੜੀ  ਰੱਖੀ  ਹੈ  ਖੋਲ੍ਹ  ਖੋਲ੍ਹ

ਕਿੱਦਾਂ  ਲੁਕਾ  ਲਓਗੇ  ਪਾਣੀ  ਦੇ  ਹੇਠ  ਦੀਵਾ

ਕਿਹੜਾ  ਨਿਆਂ  ਕਰੋਗੇ   ਨੇਰ੍ਹੇ  ਨੂੰ  ਫੋਲ  ਫੋਲ

ਪਛਤਾਵਿਆਂ  ਦੀ  ਠੰਢਕ ਨਹੀਂਓ ਸਹਾਰ ਹੋਣੀ

ਅਹਿਸਾਸ  ਬਰਫ਼  ਵਾਂਗੂੰ , ਵੇਚੋ  ਨਾ  ਤੋਲ ਤੋਲ

ਨਫਰਤ ਨੇ  ਵਿੰਗੀ ਕੀਤੀ , ਬੰਬਾਂ ਨੇ ਚਿੱਬ ਪਾਏ

ਪਹਿਲਾਂ ਤਾਂ  ਧਰਤ  ਸਾਰੀ  ਹੁੰਦੀ ਸੀ ਗੋਲ਼ ਗੋਲ਼

ਕਿੱਥੇ  ਹੈ  ਲੈ  ਕੇ ਆਈ , ਸਾਡੀ  ਪਿਆਸ  ਸਾਨੂੰ

ਬਾਰੂਦ  ਪੀ  ਰਹੇ  ਹਾਂ   ਪਾਣੀ  ‘ਚ  ਘੋਲ਼  ਘੋਲ਼

ਤੈਨੂੰ    ਤਲਾਸ਼ਦੀ   ਮੈਂ   ਪੁਲਾੜ   ਤੀਕ   ਆਈ

ਲਾਹ  ਕੇ  ਇਹ  ਖੇਸ  ਨੀਲਾ  ਕੋਈ ਤਾਂ ਬੋਲ ਬੋਲ ।