ਮੌਸਮ ਦੇ ਰੰਗ ਨਾਲ.............

ਮੌਸਮ  ਦੇ  ਰੰਗ  ਨਾਲ , ਜਾਂ   ਤੇਰੇ    ਖਿਆਲ  ਨਾਲ

ਦਿਲ ਗ਼ਜ਼ਲ ਗੁਣਗੁਣਾ ਰਿਹੈ, ਧੜਕਣ ਦੀ ਤਾਲ ਨਾਲ

ਉਨਾ ਹੀ ਲਿਸ਼ਕਿਆ  ਹੈ  ਇਹ, ਉਨਾ  ਹੀ ਚਮਕਿਐ

ਮੈਂ  ਪੂੰਝਿਆ   ਹੈ  ਨਾਂ   ਤੇਰਾ , ਜਿੰਨਾ  ਰੁਮਾਲ  ਨਾਲ

ਜੇ   ਹੁੰਦੀਆਂ   ਨੇ   ਖੱਟੀਆਂ, ਮਿੱਠੀਆਂ  ਵੀ ਹੁੰਦੀਐਂ

ਜੋ  ਲਗਦੀਆਂ  ਨੇ ਅੰਬੀਆਂ, ਉਮਰਾਂ ਦੀ ਡਾਲ ਨਾਲ

ਤੇਰਾ  ਤੇ   ਮੇਰਾ    ਸਾਕ    ਵੀ  ਉਨਾ   ਹੁਸੀਨ  ਹੈ

ਜਿੰਨਾ   ਹੁਸੀਨ  ਪੱਗ ਦਾ , ਗੋਰੀ  ਦੀ  ਸ਼ਾਲ  ਨਾਲ

ਰੰਗਣੇ   ਨੇ   ਜੇ  ਨਸੀਬ   ਤੂੰ , ਹੋਲੀ  ਦੇ  ਵਾਂਗਰਾਂ

ਮੱਥੇ 'ਤੇ  ਮੈਨੂੰ ਲਾ  ਜ਼ਰਾ, ਪੀਹ  ਕੇ  ਗੁਲਾਲ ਨਾਲ

ਪਾਈ  ਦੁਹਾਈ  ਉਮਰ   ਭਰ  ਜਿਹਨੇ ਪਿਆਸ ਦੀ

ਮੋੜੀ  ਨਦੀ  ਜਾਂ ਆ  ਗਈ  ਕੁੱਛੜ ਦੇ  ਬਾਲ ਨਾਲ

ਮਰਦਾਂ  ਨੇ ਜਿਹੜੇ  ਵੱਢ 'ਤੇ, ਸਿਰ  ਚੁੰਨੀਆਂ ਵਾਲੇ

ਹੁਣ ਦੇਖਿਓ ! ਇਹ ਉੱਗਦੇ  ਫਿਰ ਤੋਂ ਕਮਾਲ ਨਾਲ।